Bu gün, 15 yanvar tarixində qəhrəman şəhidimiz XTQ giziri Mədət Xankişiyevin mövlud günüdür.
Azərbaycan Ordusunun Xüsusi Təyinatlı Qüvvələrinin giziri olan Mədət Vəkil oğlu Xankişiyev 1998-ci ildə Cəlilabad rayonunun Çünzəli kəndində anadan olub. 2019-cu ildə Quru Qoşunlarının hərbi hissəsinə müraciət edərək MAXE olaraq xidmət etmək istədiyini bildirib. 6 aylıq kurslardan sonra "kiçik gizir" olaraq xidmətə başlayıb. Bir müddətlik xidmətdən sonra o, gizir rütbəsini alıb.
Mədət Xankişiyev 27 sentyabr 2020-ci ildə başlanan Vətən müharibəsi zamanı Füzuli, Cəbrayıl, Xocavənd, Kəlbəcər istiqamətlərində gedən döyüşlərdə iştirak edib və 18 oktyabr tarixində Qubadlının azad olunması zamanı qəhrəmancasına şəhid olub.
Mədət Xankişiyev göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən, ölümündən sonra "Vətən uğrunda", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Kəlbəcərin azad olunmasına görə" medalları və "Azərbaycan Bayrağı" ordeni ilə təltif edilib.
