Bu gün şəhid kapitan Vüsal Quliyevin mövlud günüdür. Bu haqda məlumatı Cenublu.az 5 iyun tarixində verir.
Vüsal Tahir oğlu Quliyev 1985-ci ildə Lənkəran şəhərində anadan olub. 2002-2006-cı illərdə Heydər Əliyev adına Hərbi İnstitutda ali hərbi təhsil alıb. Sonra bir müddət Zabit ixtisaslaşma kursunu keçib. 2007-ci ildə ixtisaslaşma kursunu başa vuran Quliyev Azərbaycan Silahlı Qüvvələrinin sıralarında Gəncə şəhərində yerləşən “N” saylı hərbi hissədə leytenant rütbəsində tağım komandiri kimi hərbi vəzifəsinə başlayıb.
2020-ci ilin 27 sentyabr tarixində başlanan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. Sentyabrın 28-də Tərtər rayonunun Suqovuşan qəsəbəsi istiqamətində döyüş tapşırığının yerinə yetirilməsi zamanı şəhid olub. Lənkəran şəhərində dəfn olunub.
Ölümündən sonra “Vətən uğrunda”, “Füzulinin azad olunmasına görə”, “Qubadlının azad olunmasına görə”, “İgidliyə görə” və 3-cü dərəcəli “Rəşadət” ordeni ilə təltif edilib.
