Bu gün, 17 aprel tarixində Lənkərandan olan şəhid Ehtiram Hüseynlinin doğum günüdür.
Azərbaycan Silahlı Qüvvələrinin baş leytenantı olan Ehtiram Həsən oğlu Hüseynli 1977-ci ildə anadan olub. O, 2000-2002-ci illərdə Azərbaycan Silahlı Qüvvələrinin Ordubad rayonunda yerləşən "N" saylı hərbi hissəsində müddətli həqiqi hərbi xidmətdə olub.
2020-ci ilin 27 sentyabrında başlanan Vətən müharibəsi zamanı Cəbrayıl və Qubadlının azadlığı uğrunda gedən döyüşlərdə iştirak edib. 21 oktyabr tarixində Qubadlı istiqamətində döyüş tapşırığını yerinə yetirərkən şəhidlik zirvəsinə ucalıb.
E.Hüseynli ölümündən sonra "Vətən uğrunda", "İgidliyə görə", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
