Bu gün, 27 aprel tarixində şəhidimiz Cəmil Anar oğlu Qurbanzadənin mövlud günüdür.
Cəmil Qurbanzadə 2003-cü ildə Astara şəhərində anadan olub. Astara şəhər 2 nömrəli tam orta məktəbini bitirdikdən sonra, 2020-ci ildə Azərbaycan Dövlət İdman Akademiyasının qiyabi şöbəsinə daxil olub. O, 2021-ci ilin aprel ayında hərbi xidmətə yola düşüb və tərxis olmağına 18 gün qalmış, 13 sentyabr 2022-ci ildə Azərbaycan Ordusunun həyata keçirdiyi Azərbaycan–Ermənistan sərhəd toqquşması zamanı şəhid olub.
Onun nəşi 16 sentyabr 2022-ci ildə doğulub boya-başa çatdığı Astara şəhərinə gətirilib və böyük izdihamla Astara şəhər qəbiristanlığında dəfn edilib. Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısına qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Cəmil Qurbanzadə Azərbaycan Prezidenti İlham Əliyevin Sərəncamına əsasən, ölümündən sonra 3-cü dərəcəli "Vətənə xidmətə görə" ordeni və "Vətən uğrunda" medalı ilə təltif edilib.
