Bu gün, 19 iyun tarixində Azərbaycanın Milli Qəhrəmanı, Qarabağ müharibəsi şəhidi Səfa Axundovun doğum günüdür.
Səfa Fətulla oğlu Axundov 1958-ci ildə Masallı rayonunda anadan olub. İlk təhsilini Saatlı rayonunda alıb, sonra Cəlilabad rayonuna köçdüklərindən təhsilini burada davam etdirib. Səfa uşaqlıq vaxtlarından təyyarəçi olmaq arzusunda idi, bu istəyi onu Bakı Aeroportuna gətirir. Daha sonra isə Orenburq Mülki Aviasiya Məktəbinə daxil olur. 1979-cu ildə bu məktəbi bitirərək Yevlax rayonundakı aeroportda pilot təyin edilir.
1987-ci ildə Riqada yaşayan Səfa Ermənistanın Azərbaycan torpaqlarını işğal etməsinə biganə qalmayaraq Azərbaycana dönür. 1989-cu ildə Zabrat "Azal-aero" Aviaşirkətinə məxsus “Mİ-8” helikopterinə 2-ci pilot təyin edilir.
1992-ci il yanvarın 28-də Şuşaya iki uğurlu uçuş edib. Yenidən Şuşa istiqamətində uçuş edərkən Xankəndi istiqamətindən atılan raket helikopteri parçalayıb. Üç heyət üzvü və 47 nəfər sərnişin faciəli surətdə həlak olublar.
Azərbaycan Respublikası Prezidentinin 25 noyabr 1992-ci il tarixli 337 saylı fərmanı ilə Axundov Səfa Fətulla oğlu ölümündən sonra "Azərbaycanın Milli Qəhrəmanı" adına layiq görülüb. Bakıda Şəhidlər xiyabanında dəfn edilib. Cəlilabad şəhərinin mərkəzində büstü qoyulub, rayon Mədəniyyət Evinə və şəhərin küçələrindən birinə onun adı verilib.
Evli idi, iki oğlu yadigar qalıb.
