18 sentyabr ölkəmizdə Milli Musiqi Günü kimi qeyd edilir. 1885-ci ilin məhz bu günündə dahi Azərbaycan bəstəkarı və musiqişünası, milli bəstəkarlıq məktəbinin banisi, müasir Azərbaycan musiqi mədəniyyətinin qurucusu, Şərqdə ilk opera və musiqili komediyaların yaradıcısı, böyük mütəfəkkir alim Üzeyir Hacıbəyli dünyaya gəlib.
Üzeyir bəyin ad gününün bayram kimi qeyd edilməsi ənənəsinin əsasını Maestro Niyazi qoyub. Üzeyir bəyin vəfatından sonra maestro hər il bu günü qeyd edərmiş.
Ulu öndər Heydər Əliyevin “Üzeyir Musiqi Gününün keçirilməsi haqqında” 1995-ci il 18 sentyabr tarixli Fərmanı isə bu bayramı - Üzeyir Musiqi Gününün qeyd edilməsini rəsmiləşdirib. Fərmana əsasən həmin tarixdən etibarən Üzeyir Hacıbəylinin doğum günü Milli Musiqi Günü kimi ölkə miqyasında keçirilməyə başlanıb. Bunun da böyük mədəni və tarixi əhəmiyyəti var. Bu, Üzeyir Hacıbəylinin adının və irsinin əbədiləşdirilməsi, qorunması, təbliği və gələcək nəsillərə ötürülməsi yolunda atılan mühüm addımdır.
Üzeyir bəy elmi musiqişünaslığın, musiqi təhsilinin əsasını qoyub və ömrünün sonunadək musiqi mədəniyyətinin inkişafına rəhbərlik edib. Dahi bəstəkarın yaratdığı musiqi inciləri dünya şöhrəti qazanıb və dünya musiqi mədəniyyətinin qızıl fonduna daxil olub. Görkəmli musiqi xadimləri onu “professional Şərq musiqisinin atası” adlandırıblar. Azərbaycan və dünya musiqi mədəniyyətinin inkişafında misilsiz xidmətləri olan Ü.Hacıbəylinin anadan olmasının 100 illik yubileyi YUNESKO-nun qərarı ilə beynəlxalq miqyasda qeyd olunub.
Ənənəvi olaraq Milli Musiqi Günü Azərbaycan Dövlət Konservatoriyasının önündə minlərlə insan toplaşır və burada Üzeyir Hacıbəyovun adını daşıyan Azərbaycan Dövlət Simfonik Orkestri bəstəkarın əsərlərini ifa edir.
