Bu gün Astara rayonunun təşkil edilməsindən 92 il keçir.
Astara rayonu ölkənin cənubunda, İran İslam Respublikası ilə sərhəddə, şimalda Lənkəranla, şimal-qərbdə Leriklə həmsərhəddir. Rayon 8 avqust 1930-cu ildə təşkil edilib. 1963-cü ildə isə ləğv edilərək Lənkəran rayonuna birləşib. 1965-ci ildən yenidən müstəqil rayon olub.
Tarixi faktlar təsdiq edir ki, Astara şəhəri Azərbaycanın Talış mahalının qədim və inkişaf etmiş məntəqələrindən biri olub. Astara şəhərinin adı qədim dünya alimlərinin kitablarında, səyyahların qeydlərində, coğrafiyaşünasların xatirələrində öz əksini tapıb.
AzStat-ın məlumatına əsasən, 01.01.2019-cu ildə rayonun əhalisi 108 min 634 nəfər təşkil edib. Astara rayonu ərazisində 1 şəhər, 2 qəsəbə və 89 kənd olmaqla, ümumilikdə 92 yaşayış məntəqəsi yerləşir.
Həmçinin, rayonda 8 məktəbəqədər uşaq müəssisəsi, 62 kitabxana, 28 klub, 5 mədəniyyət evi və biri rus dilli olmaqla, 63 məktəb fəaliyyət göstərir. 62 məktəbdə 1-ci sinifdən 4-cü sinfə qədər həftədə 2 saat talış dili dərsləri keçirilir.
