Biləsuvarda əmi ilə qardaşı oğlu arasında torpaq mübahisəsi məhkəmə ilə nəticələnib.
Hadisə şəhərin mərkəzi bazarının qarşısında baş verib. Məhkəmə materiallarına görə, əmi əvvəlcə qardaşı oğlunu nalayiq ifadələrlə təhqir edib, daha sonra onun üz nahiyəsinə bir dəfə zərbə endirib. Nəticədə zərərçəkmiş sağ qulaq nahiyəsində hematoma ilə müşayiət olunan, sağlamlığın qısa müddətə pozulmasına səbəb olan yüngül bədən xəsarəti alıb. Hadisə insanların sıx olduğu ictimai yerdə baş verdiyi üçün əməl xuliqanlıq kimi qiymətləndirilib.
Təqsirləndirilən şəxs məhkəmədə özünü qismən təqsirli bilib. O bildirib ki, mübahisə torpaq sahəsinin icarəsinə görə yaranıb. İddiasına əsasən, torpaq üçün 150 manat ödəsə də, nə torpaq ona verilib, nə də pulu tam qaytarılıb.
Onun sözlərinə görə, hadisə günü bazarın qarşısında pulunu tələb edib. Qarşı tərəfin onu təhqir etdiyini deyən əmi əsəbiləşərək qardaşı oğluna bir şillə vurduğunu etiraf edib. O, əməlindən peşman olduğunu, sonradan üzr istəyərək barışmağa çalışdığını, lakin bunun baş tutmadığını da deyib.
Məhkəmə onu Cinayət Məcəlləsinin 221.1-ci maddəsi – xuliqanlıq üzrə təqsirli bilərək 9 ay müddətinə azadlığın məhdudlaşdırılması cəzasına məhkum edib.
Mənbə: Qaynarinfo.az
