AMEA Arxeologiya və Antropologiya İnstitutunun "Yardımlı arxeoloji ekspedisiyası" tərəfindən Yardımlı rayonu ərazisində yerləşən Ökü kurqanlarından birində arxeoloji qazıntılar başa çatdırılıb.
Cenublu.az xəbər verir ki, İnstitutun aparıcı elmi işçisi, tarix üzrə fəlsəfə doktoru, dosent Anar Ağalarzadənin rəhbərliyi ilə aparılan qazıntılar zamanı kurqanda maraqlı dəfn adətləri müəyyən edilib.
Ökü kurqanları Yardımlı-Arvana şosse yolunun sağ tərəfində, yoldan 1,5 kilometr şimal-şərqdə, Qayabaşı adlanan hündür dağ silsiləsinin ətəyində yerləşir. Dəniz səviyyəsindən 1650 metr yüksəklikdə yerləşən kurqanın qazıntısı zamanı bunun nisbətən alçaq təbii təpə üzərində qaya daşları ilə sıx örtülmüş qəbir abidəsi olduğu müəyyən edilib.
Arxeoloji qazıntılar nəticəsində kurqanın şərq və cənub-şərq tərəfində bir-birinə yaxın beş insan dəfni aşkar olunub. Ərazinin sərt torpaq relyefi və ümumi landşaft xüsusiyyətləri burada dəfnlərin dayaz qazılmış qəbir kameraları ilə tamamlandığını göstərib.
Qəbirlər, bir qayda olaraq, insan dəfnlərinin ətrafına daşlar düzülməklə salınıb. Maraqlı xüsusiyyətlərdən biri də dəfnlərin müxtəlif formada olmasıdır. Burada sağ yanı üstə sıx bükülü, arxası üstə uzadılmış, hətta dik vəziyyətdə, gil qabın içərisində parçalanmış şəkildə dəfn edilmiş insan skeletlərinə də rast gəlinib. Analoji dəfnlər 2019-cu ildə Yardımlının Komanı yaylaqlarında aparılan qazıntılar zamanı da aşkar edilərək tədqiq olunub.
Ökü kurqanından aşkar edilən arxeoloji materiallar əsasən qırmızı rəngli, qum tərkibli və "ələ bulanan" xassəyə malik keramika nümunələrindən ibarətdir. Fraqmentlər halında tapılmasına baxmayaraq, qabların tipoloji xüsusiyyətlərini müəyyənləşdirmək mümkündür. Bunlar küpə, kuzə və miniatür qab qırıqlarıdır.
Kurqanın ən maraqlı xüsusiyyətlərindən biri isə daşdan yonulmuş insan bütlərinin və müxtəlif əmək alətlərinin aşkar edilməsidir.
Qəbirlərin baş tərəfində yerləşən bəzi qaya daşlarının üzərində qazıma üsulu ilə həndəsi motivli işarələr və "həyat ağacı" təsviri də müəyyən edilib. Bu tapıntıların Ökü abidələrinin xüsusiyyətlərinin gələcəkdə daha dərindən öyrənilməsinə imkan verəcəyi bildirilir.
