“Azərxalça” ASC-nin Lənkəran filialında fəaliyyət göstərdiyi altı il ərzində 1044 xalça toxunub. Bu haqda məlumatı Cenublu.az bu gün, 14 mart tarixində Azertac-a istinadən verir.
Modern üslubda zərif ipək xalçalara dünya bazarında maraq və tələbat çoxdur. Bu amil nəzərə alınaraq, “Azərxalça”nın Lənkəran filialında 6 aya yaxındır ki, ipək xalçalar da toxunur. Artıq ilk ipək xalçanın toxunuşu başa çatıb. Toxucu Rədifə Beyqiyeva deyir ki, ipək sapdan xalça toxumaq çox vaxt və diqqət tələb edir. Ölçüsü bir kvadratmetr olan ipək xalça 2 nəfər tərəfindən 3 aya toxunur:
“Birinci dəfədir ipək xalça toxuyuruq. Özüm üçün də çox maraqlı gəldi. İpək xalçanın toxunuşu 90 günə başa gəlir. Həvəslə işləyirik”.
Yüksək keyfiyyətli xalçalar üçün xammal xarici bazarlardan gətirilir. Burada peşəkar, təcrübəli ustalar tərəfindən müxtəlif çeşnilərdə xalçalar da toxunur.
“Azərxalça” ASC-nin Lənkəran filialının direktoru Nargilə Qənbərova bildirib ki, indi bazarda keyfiyyətli xalçalara tələbat var. Alıcılar zövqlərinə uyğun, xarici bazarın tələbatına cavab verən xalçalar istəyirlər. Ona görə də, emalatxanada peşəkar toxucular çalışırlar.
“Peşəkarlıq, keyfiyyət həm də toxunan xalçaların ilmə sayına görə müəyyən olunur. Əgər əvvəllər toxucularımız əməkhaqqını 1 kvadratmetrə görə alırdılarsa, indi ilməyə görə alırlar. Toxucu var ki, gündə 10 min ilmə toxuyur”, – deyə Nargilə Qənbərova əlavə edib.
[caption id="attachment_55786" align="alignnone" width="336"]
Foto Azertac[/caption]
[caption id="attachment_55784" align="alignnone" width="336"]
Foto Azertac[/caption]
