Azərbaycan Respublikası Müdafiə Nazirliyi hərbi xidmət sistemində yeni bir yanaşma tətbiq etməyə başlayıb. Yeni konsepsiyaya əsasən, hərbi xidmətdə olan yüksək intellektə və xüsusi bacarığa malik, istedadlı hərbi qulluqçular üçün fərqli imkanlar yaradılır.
Cenublu.az xəbər verir ki, bu əsgərlər ilkin hazırlıq mərhələsini uğurla başa vurduqdan sonra xidmətlərini daha spesifik və məqsədyönlü şəraitdə davam etdirirlər.
Belə ki, onlar Milli Müdafiə Universitetinin tərkibində yaradılmış xüsusi bölmələrə seçilərək yönləndirilir. Bu bölmələrdə hərbi qulluqçuların elmi potensialı və texniki bacarıqları nəzərə alınaraq, onlar müxtəlif layihə və təşəbbüslərə cəlb olunurlar.
Bəs xaricdə dövlət xətti ilə təhsil alan tələbələr (bakalavr və ya magistr) Milli Müdafiə Universitetinin tərkibində yaradılmış bölmələrə necə seçiləcəklər? Seçilənlər digər əsgərlər kimi 40 günlük karantində olacaqlarmı?
Bu suallara cavab tapmaq məqsədilə Müdafiə Nazirliyinə müraciət etdik. Nazirliyin mətbuat xidmətindən baku.ws-in sorğusuna cavab olaraq bildirildi ki, dövlət proqramı çərçivəsində yalnız top 500 universitetlərin bakalavr və magistr məzunları Təhsildə Keyfiyyət Təminatı Agentliyindən arayış təqdim etdikdə həmin bölmələrdə xidmət edə bilərlər:
"Bütün əsgərlər mütləq şəkildə gənc əsgər proqramını bitirməlidirlər. İntellektual bölmələrin hərbi qulluqçuları bu bölmələrin tərkibində qalmaqla hərbi xidmətlərini Nazirliyin müxtəlif Baş İdarə, İdarə, Xidmət və müəssisələrində davam etdirəcəklər.
Azərbaycan Respublikası Müdafiə Nazirliyində hərbi xidmətkeçmə ilə bağlı yeni konsepsiyaya əsasən, hərbi xidmətdə olan yüksək intellektə malik istedadlı hərbi qulluqçular gənc əsgərlərin hazırlığı proqramını başa çatdırdıqdan sonra hərbi xidmətlərini Milli Müdafiə Universitetinin tərkibində yaradılmış bölmələrdə xüsusi şəraitdə davam etdirirlər.
Həmin hərbi qulluqçular qeyd edilən bölmələrdə öz ixtisaslarına uyğun müxtəlif layihələrə və fəaliyyətlərə cəlb olunurlar.
İntellektual qabiliyyətli bölmələrdə cari təqvim ilindən əvvəlki təqvim ilinin nəticələrinə görə beynəlxalq reytinqi ("Times Higher Education (THE) World University Rankings" və ya "Academic Ranking of World Universities" (Shanghai)) ilk 500-cü sırada yer alan xarici ali təhsil müəssisəsinin bakalavriat və ya magistratura proqramlarının məzunları olan çağırışçıların həmin intellektual qabiliyyətli bölmələrdə xidmət etmələri nəzərdə tutulmuşdur.
Hazırda Müdafiə Nazirliyinin tabeliyindəki hərbi hissələrdə xidmət keçən, yuxarıda qeyd olunmuş siyahılarda yer alan xarici təhsil müəssisələrində təhsil almış hərbi qulluqçuların adıçəkilən bölmələrdə xidmət etmələrini təmin etmək məqsədilə onların ailə üzvlərindən aşağıda qeyd olunan məlumatları [email protected] elektron ünvanına göndərmələri xahiş olunur:
- çağırışçının adı, soyadı və ata adı;
- çağırış rübü və ili (çağırıldığı tarix);
- Xarici dövlətlərin təhsil müəssisələrində ali təhsil almış şəxslərin ixtisaslarının Təhsildə Keyfiyyət
Təminatı Agentliyi (TKTA) tərəfindən tam tanınmasına (akademik və peşə) dair sənəd (PDF formatında) və ya tanınma prosesinin başlamasına dair sistemdən çıxarış.
Qeyd: Növbəti çağırışlarda Müdafiə Nazirliyinin tabeliyindəki hərbi hissələrdə xidmətə başlayacaq, yuxarıda qeyd olunan kateqoriyaya aid olan çağırışçıların intellektual bölmələrdə xidmət etmələrinin təmin edilməsi məqsədilə müvafiq məlumatların onların ailə üzvləri tərəfindən çağırış ayının əvvəlindən növbəti ayın sonunadək [email protected] elektron ünvanına göndərilməsi xahiş olunur".
