Azərbaycanda eşşəklərin sayında azalma davam edir.
Modern.az xəbər verir ki, 2025-ci ilin əvvəlində ölkədə 12 709 baş eşşək olub.
Bu göstərici ötən illə müqayisədə 2 215 baş azdır. Ümumilikdə son illərdə Azərbaycanda eşşəklərin sayı sürətlə azalır. Belə ki, 2004-cü ildə ölkəmizdə 42.2 min, 2014-cü ildə 43.4 min baş eşşək olduğu halda, 2024-cü ilin məlumatlarına görə bu rəqəm 14.9 min olub. Rəsmi qurumlar azalmanın səbəbini açıqlamayıb.
Ötən il eşşəklərin böyük hissəsinin - 68 faizinin yaşı 3 və daha çox olub.
Statistikaya görə, ən çox eşşəyin olduğu rayon Lerik (1 151 baş) olsa da, rayonda bu heyvanların sayında ötən illə müqayisədə ciddi azalma olub. Belə ki, ötən il Lerikdə 1 362 baş eşşək qeydə alınıb.
Qeyd edək ki, Lənkəran-Astara iqtisadi rayonu üzrə eşşəklərin sayı 2535-dür.
