Taliban hökuməti hakimiyyətə gəldikdən sonra ölkələrindən qaçıb Azərbaycana İrandan qanunsuz keçməyə cəhd edən Əfqanıstan vətəndaşları Haidari Ezatulla Abdulkasım və Seraj Helaluddin Serajeddinə hökm oxunub. Bu haqda məlumatı Cenublu.az bu gün, 28 dekabr tarixində Report.az-a istinadən verir.
Astara Rayon Məhkəməsində keçirilən iclasda onlar 1 il 6 ay müddətinə azadlıqdan məhrum ediliblər. Cəzalarını çəkdikdən sonra hər iki şəxs məcburi olaraq Azərbaycan ərazisindən çıxarılacaq.
İstintaq materiallarına əsasən, onlar sentyabrın 10-da gecə saatlarında “Lənkəran” sərhəd dəstəsinin Astara rayonunun Qapıçıməhəllə kəndi yaxınlığında yerləşən sərhəd zastavasının xidməti ərazisində İrandan Azərbaycan istiqamətində dövlət sərhədini qanunsuz keçməyə çalışarkən saxlanılıblar.
Araşdırma zamanı saxlanılan şəxslərin dövlət sərhədini Azərbaycandan Avropa ölkələrinə getmək məqsədilə pozduqları müəyyən olunub.
Onlara qarşı Cinayət Məcəlləsinin 318.2 (qabaqcadan əlbir olan bir qrup şəxs tərəfindən zor tətbiq etməklə Azərbaycan Respublikasının dövlət sərhədini qanunsuz olaraq keçmə) maddəsi ilə ittiham irəli sürülüb.
