Astara Rayon Məhkəməsində xuliqanlıqda təqsirləndirilən İmamverdi Məmmədovun (soyadı şərti) cinayət işi üzrə məhkəmə istintaqı yekunlaşıb. Bu haqda məlumatı Cenublu.az bu gün, 12 yanvar tarixində Pravda.az-a istinadən verir.
Pravda.az-ın əldə etdiyi məlumata görə, hakim Zamin İbrahimovun sədrliyi ilə keçirilən prosesdə hökm oxunub.
Məhkəmənin hökmü ilə qazancının 20 faizi dövlət nəfinə tutulmaqla o, 11 ay 22 gün müddətinə islah işləri cəzasına məhkum olunub.
İttihama görə, hadisə ötən il Astara rayonu Çayoba kəndində yerləşən “Ümid” restoranında keçirilən toy mərasimində qeydə alınıb.
Belə ki, xalası oğlunun toy məclisində iştirak edən İmamverdi Məmmədovun atası zərərçəkmiş İlyas Səfərovun (soyadı şərti) həmin vaxt ifa olunan musiqisini dayandırıb. Zərərçəkmiş də ona irad bildirib, təkidlə musiqi sifariş verib. Bu zaman İmamverdi onlara yaxınlaşıb, İlyasa qarşı nalayiq ifadələr işlədib. Daha sonra təqsirləndirilən şəxs zərərçəkmişin baş nahiyəsinə bir neçə dəfə yumruqla zərbələr vuraraq ona xəsarət yetirib.
Hadisədən sonra İmamverdi Məmmədov cinayət məsuliyyətinə cəlb edilib.
