Astara Rayon İcra Hakimiyyətinin başçısı Qəzənfər Ağayev sakinləri qəbul edib. Bu haqda məlumatı Cenublu.az bu gün, 10 yanvar tarixində verir.
Görüş Ərçivan qəsəbəsində baş tutub. Burada rayonun hüquq-mühafizə orqanlarının, idarə və müəssisələrinin rəhbərləri iştirak ediblər. Ərçivan qəsəbə inzibati ərazi dairəsi üzrə nümayəndəsi Rüfət Əsədullayev son bir ildə qəsəbədə görülən quruculuq, abadlıq işləri barədə ətraflı məlumat verib.
Qəbul zamanı sakinlər məhəllələrinin elektrik xəttini ayırmaq üçün ayırıcı qoyulması, Ərçivan-Şuvi avtomobil yolunda sürət həddinə riayət edilməsi üçün radar quraşdırılması və qəsəbə ərazisində radarların sayının artırılması, qəsəbədə Ailə Sağlamlıq Mərkəzinin təmir edilməsi, Gənclər və Bəxtiyar Əliyev küçələrinin asfalt olunmayan hissəsinin asfaltlaşdırılması, 1 saylı tam orta məktəbə gedən yolda işıqlandırma sisteminin qurulması, 3 saylı tam orta məktəbdə istilik sisteminin işləməsi üçün qaz xəttinin qoşulması, qəsəbənin içməli su xətti ilə təmin edilməsi, çayların çirklənməsinin qarşısının alınmasından ötrü tədbirlərin görülməsinə köməklik göstərilməsi ilə bağlı müraciətlər səsləndiriblər.
Qəzənfər Ağayev qaldırılan əksər məsələlərin qısa vaxt ərzində həlli ilə əlaqədar aidiyyəti qurumların rəhbərlərinə tapşırıqlar verib.
