Astara yük terminalının tikintisinin bitəcəyi tarix barədə Azərbaycanın Baş nazirinin müavini Şahin Mustafayevlə İranın yol və şəhərsalma naziri Mehrdad Bəzirpaş arasında danışıq olub. Bu haqda məlumatı Cenublu.az bu gün, 18 iyul tarixində Report.az-a istinadən verir.
Belə ki, İran İslam Respublikasının Astara şəhərində keçirilmiş görüşdə tikintinin gələn ilin sonuna qədər başa çatdırılacağı nəzərdə tutulan Azərbaycan və fars dillərində kommünike qəbul olunub.
Həmçinin kommünikedə Astaraçay üzərində avtomobil körpüsünün gömrük və sərhəd infrastrukturunun yaradılmasının tezliklə tamamlanmasının zəruriliyi qeyd edilib.
Qeyd edək ki, Ş. Mustafayev və M. Bəzirpaş Azərbaycanla İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədrləridir.
