Azərbaycan poeziyasının görkəmli nümayəndəsi, dövlət xadimi Xurşidbanu Natəvanın anadan olmasının 190 illik yubileyinə həsr olunmuş “Xurşidbanu Natəvan - Azərbaycan qadınının parlaq nümunəsi” mövzusunda sərgi və tədbir keçirilib. Bu haqda məlumatı Cenublu.az bu gün, 3 avqust tarixində Astara Heydər Əliyev Mərkəzinə istinadən verir.
Tədbirdə Natəvanın həyatı və yaradıcılığı ilə bağlı geniş məruzə ilə çıxışlar olunub. Bildirilib ki, Xurşidbanu Natəvanın yaradıcılığı həmişə diqqət mərkəzində olub, xatirəsinin əbədiləşdirilməsi istiqamətində ölkəmizdə bir sıra tədbirlər həyata keçirilib, o cümlədən 1960-cı ildə Bakıda şairənin heykəli, 1982-ci ildə Ulu Öndər Heydər Əliyevin iştirakı ilə Şuşada büstü ucaldılıb.
Daha sonra Astara rayon Heydər Əliyev Mərkəzinin və Astara rayon Mərkəzləşdirilmiş kitabxana sisteminin birgə təşkilatçılığı ilə Xurşidbanu Natəvanın yubileyinə həsr olunmuş sərgiyə baxış keçirilib.
Qeyd edək ki, tədbir Lənkəran Regional Mədəniyyət İdarəsinin Astara rayonu üzrə nümayəndəliyinin, Astara rayon Heydər Əliyev Mərkəzinin, Astara rayon Mərkəzləşdirilmiş kitabxana sisteminin, Astara rayon Tarix-diyarşünaslıq muzeyinin, Gənclərin İnkişaf və Karyera Mərkəzinin Astara nümayəndəliyinin, M.Ə.Sabir adına Astara şəhər 1 saylı tam orta məktəbinin və Astara rayon S.Vurğun adına Təngərüd kənd tam orta məktəbinin birgə təşkilatçılığı ilə baş tutub.
