Astara rayonu, Siyəkü kəndi, Fətəlioba məhəlləsinin sakinləri internetdən istifadə etməkdə çətinlik çəkirlər. Bu haqda məlumatı Cenublu.az bu gün, 13 avqust tarixində Apa.az-a istinadən verir.
Belə ki, kənddə internet xətti mövcud olsa da, sakinlər bundan yetərincə istifadə edə bilmirlər. Səbəb isə məhəllənin hər 30-32 sakininə 1 vayfay və 1 meqabayt (MB) internetin düşməsidir. 135-ə yaxın ailənin yaşadığı məhəllədə cəmi 4-5 nəfərin evində stasionar telefon mövcuddur. Mobil internetdən istifadə isə həm bahadır, həm də sürət olmadığı üçün həmin internetlə istədikləri informasiyanı yükləyə bilmirlər.
Problemlə bağlı "Aztelekom" MMC-nin Kommersiya departamentinin ictimaiyyətlə əlaqələr üzrə meneceri Alidə Mustafayeva bildirib ki, Astara rayonunun Siyəkü kəndinin Fətəlioba məhəlləsində telekommunikasiya xidmətlərinin təminatı ilə əlaqədar texniki imkanlar məhdud olduğundan, hazırda vətəndaşların müraciətinin təmin edilməsi istiqamətində işlər aparılır.
“Aztelekom” MMC tərəfindən ölkə üzrə həyata keçirilən “Onlayn Azərbaycan” layihəsi çərçivəsində ərazidə müasir rabitə xidmətlərinin təminatı üçün texniki quraşdırma işləri mərhələli şəkildə aparılmaqdadır. 2024-cü il ərzində yeni stansiya avadanlıqlarının quraşdırılması, xətt şəbəkəsinin genişləndirilməsi və genişzolaqlı internet xidmətinin göstərilməsi nəzərdə tutulur”, - deyə o, bildirib.
