Astara rayonunun Maşxan kəndində Vətən müharibəsi şəhidi Rauf Cahangirovun xatirəsinə inşa edilən bulağın açılışı baş tutub. Bu haqda məlumatı Cenublu.az bu gün, 2 sentyabr tarixində ARB Cenub-a istinadən verir.
Açılış mərasimində Astara rayonu İcra Hakimiyyətinin nümayəndələri, şəhid ailələri, qazilər, şəhidin doğmaları və ictimaiyyət nümayəndələri iştirak ediblər.
Qeyd edək ki, Rauf Cahangirov 1998-ci ildə Astara rayonunun Maşxan kəndində anadan olub. 2015-ci ildə kənd məktəbini bitirdikdən sonra Lənkəran Dövlət Universitetinə daxil olub. 2019-cu ildə hərbi xidmətə yollanan Rauf xidmətini şərəflə başa vurduqdan 3 ay sonra könüllü orduya yazılıb. O, 2020-ci ilin 21 sentyabrından hərbi təlimlərə qatılıb. Füzuli, Cəbrayıl, Xocavənd, Hadrut, Zəngilan və Şuşa uğrunda gedən döyüşlərdə qəhrəmanlıq göstərib. 2 noyabr Şuşa istiqamətində döyüşərkən qəhrəmancasına şəhid olub.
Ölümündən sonra “Füzulinin azad olunmasına görə”, “Cəbrayılın azad olunmasına görə”, “Xocavəndin azad olunmasına görə” və “Vətən uğrunda” medalları ilə təltif olunub.
