Astara rayon icra hakimiyyətinin başçısı Qəzənfər Ağayev növbəti səyyar qəbul-görüşünü Siyaku kənd inzibati ərazi dairəsi üzrə nümayəndəliyinin Rinə kəndində keçirib. Bu haqda məlumatı Cenublu.az bu gün, 31 avqust tarixində icra hakimiyyətinə istinadən verir.
Görüşdə rayonun inzibati orqanlarının, idarə və müəssisələrin rəhbərləri iştirak ediblər. İlk öncə icra başçısı kənddə son zamanlar görülən işlər haqda danışıb. O, kəndin elektrik xətt təsərrüfatında təmir işlərinin aparılmasının, yeni transformatorun quraşdırılmasının, Niləşə kəndində avtomobil yolu üzərində yeni körpünün qoyulmasının, avtomobil yollarının asfaltlanmasının, kənddə yeni müasir tipli məktəb binasının tikilməsinin, qaz xəttinin çəkilməsinin ötən görüşlərdə verilən təkliflər əsasında həyata keçirildiyini bildirib.
Sakinlər öz növbələrində kənddə telefon nömrələrinin artırılması və internet şəbəkəsinin genişləndirilməsinə, Çüvaş kəndində çay üzərində yeni avtomobil körpüsünün salınmasına, Çüvaş, Viləşə, Taxtanakəran və Bili kəndlərinə qaz xəttinin çəkilməsinə, elektrik xətt təsərrüfatının yenilənməsinə, Siyaku kəndinə qəsəbə statusunun verilməsinə, Viləşə, Bili və Çüvaş kəndlərinin avtomobil yolunun təmir edilməsinə köməklik göstərilməsini xahiş ediblər.
İcra başçısı səlahiyyətində olan məsələlərin həlli ilə əlaqədar rayonun təsərrüfat və xidmət sahələrinin rəhbərlərinə tapşırıqlar verib, digər məsələləri isə aidiyyəti üzrə yönləndirib.
