Şəhid baş leytenant Vüsal Kazımovun atası, Astara Pedaqoji Kollecinin direktoru Kamran Kazımov övladının adına park salmasına baxmayaraq, onun açılışını edə bilmir. Bununla bağlı o, öz sosial şəbəkə hesabında paylaşım edib.
K.Kazımov qeyd edib ki, şəhidlərin adını yaşada bilmək, əbədiləşdirmək valideynlərə rahatlıq verir: “Lənkəran rayon Yuxarı Nüvədi kəndində oğlum, şəhid baş leytenant Vüsal Kazımovun adına xatirə parkı salmaq üçün müraciət etdik. Lənkəran rayon icra orqanları ərazini bizə verdilər. Kənd camaatının, Vüsalın dostlarının sayəsində bizə verilən 1200 kvadratmetr ərazidə park saldıq. Parkda kənd uşaqlarının, kənd adamlarının dincəlməsi üçün bacardığımız şəraiti qurduq və beləcə Vüsalın adını daşıyan bulağı inşa etdik. Parkın açılış mərasimini 29 noyabr 2022-ci il – şəhidimizin ildönümü tarixinə razılaşdırmışdıq. Lakin administrasiyadan daxil olan məktuba əsasən, belə halların Mədəniyyət Nazirliyi tərəfindən qeydiyyata alındıqdan sonra açılması tövsiyə olundu. Belə olan halda Lənkəran şəhər İcra Hakimiyyəti tərəfindən razılıq almaqdan ötrü məktub və müvafiq sənədlər göndərildi və xahiş etdik ki, 17 dekabr – şəhidin doğum günü tarixində açılış mərasiminə razılıq versinlər. Lakin açılış mərasiminə icazə verilmədi”.
Kamran Kazımov onu da əlavə edib ki, 14 iyul 2023-cü ildə Lənkəranda qəbul keçirən mədəniyyət naziri Adil Kərimli ilə şəxsən görüşüb hadisəni təfsilatı ilə izah edib: “Nazir isə bunun heç bir problem olmadığını dedi və qısa zamanda həll olunacağına söz verdi. Əvəzində 3 aydan sonra bir cavab gəldi ki, müəyyən sənəd təqdim edin. Yenə də Mədəniyyət Nazirliyinin nəzdində fəaliyyət göstərən təşkilatda baxılacaq. Nəhayət, dekabrın 1-də komissiya Lənkəran Şəhər İcra Hakimiyyəti Memarlıq şöbəsi əməkdaşının iştirakı ilə iclasda məsələ ilə bağlı qərar verdilər: “Parkda şəhidlərin şəkli olacağı təqdirdə razılıq verilmir, gərək barelyef düzəldilsin”. “Bu da o deməkdir ki, mən gərək köhnəlmiş “partokrat”ların ictimai komissiyasına müəyyən məbləğ ödəyim və onlardan barelyef üçün rəy alım. O gündən bu günə qədər mən bütün qurumlara müraciət etmişəm, amma hələ də o əraziyə park statusu verilməyib.
İndi üzümü sizə tutub deyirəm, ey mənim xalqım, bu halda mən nə etməliyəm? - deyə şəhid atası bildirib.
