Masallıda kəndlilər arasında dava olub.
Cenublu.az-ın əldə etdiyi məlumata görə, hadisənin istintaqı Masallı Rayon Məhkəməsində keçirilib.
Belə ki, təqsirləndirilən Novruz Nəcəfov (ad şərtidir) 1962-ci ildə Masallı şəhərində doğulub. Ötən ilin oktyabr ayında həmkəndlisi, zərərçəkmiş Oruc Qurbanovun (ad şərtidir) təsərrüfatında saxladığı iti həyat yoldaşı Sevda Nəcəfovanın (ad şərtidir) üstünə hürüb. Bu səbəbdən Orucla Novruz arasında mübahisə yaranıb. Mübahisə zamanı ağac parçası ilə qəsdən həmkəndlisinə zərbə endirib, daha sonra onu yerə yıxaraq yumruq və təpiklə xəsarətlər yetirib.
Bununla da Novruz Nəcəfov Azərbaycan Respublikası CM-nin 128-ci (sağlamlığa zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Novruz Nəcəfov ona qarşı irəli sürülən ittiham üzrə özünü təqsirli bilməyib:
“Hadisə günü evin həyətində olarkən həyat yoldaşım Sevdanın qışqırıq səsini eşitdim. Çölə çıxdıqda Oruca məxsus itin arvadımın üzərinə hürdüyü üçün onun qorxaraq kolluğa tərəf çəkilməsinin şahidi oldum. Oruc orada olduğu üçün dedim ki, itinə sahib çıx, bağlı şəkildə çölə çıxar. Çünki həmin it dəfələrlə ailə üzvlərimə hücum edib.
Sözlərimə qarşılıq olaraq Oruc dedi ki, it hücum etməyib, sadəcə hürüb. Ardınca əlimdə olan ağac parçası ilə onu bir dəfə vurdum. Daha sonra o məni təpikləməyə və vurmağa başladı”.
Ardından məhkəmədə zərərçəkmiş Oruc Qurbanov ifadə verib:
“Heyvanları örüş sahəsinə apararkən Novruzun arvadı Sevda ilə üzbəüz gəldik. Şəxsi təsərrüfatımda saxladığı it Sevdaya hürdüyü üçün qorxmağa başladı. Dedim ki, it cummayacaq, keç get. Bir az sonra əri çıxıb söyüş söyməyə başladı. Əlinə mobil telefonunu alaraq videoçəkiliş aparmaqla üzərimə gəlib, bir kəllə və yumruq zərbəsi ilə vurdu”.
Məhkəmənin qərarı ilə Novruz Nəcəfov 6 ay müddətinə azadlıqdan məhrum edilib.
Fidan İlqar
