Son günlər müşahidə olunan anomal istilərin yaratdığı fəsadlar ciddi narahatlıq doğurur. Təkcə Azərbaycanda deyil, bir çox ölkələrdə qış mövsümünə uyğun olmayan hava şəraiti müşahidə olunur və bəzi yerlərdə bu hal meşə yanğınları ilə nəticələnib.
Mütəxəssislər bildirirlər ki, belə hava şəraiti əkin sahələrinə, bağçılıq təsərrüfatına və məişətə zərər verən ziyanvericilərin artmasına səbəb olur. Havanın temperaturunun kəskin yüksəlməsi həşəratların aktivləşməsinə gətirib çıxarıb. Bölgələrdə xüsusilə çəyirtkələrin sayının artdığı qeyd olunur.
Ekoloq Sərvər Nəbiyev Bizim.Media-ya açıqlamasında bildirib ki, anomal istilər nəticəsində çəyirtkə və digər həşəratların artması həm qısamüddətli təsirlərlə, həm də uzunmüddətli iqlim dəyişiklikləri ilə bağlı ola bilər.
"Anomal istilər böcəklərin daha sürətli inkişaf etməsinə şərait yaradır. İstilik onların metabolizmini sürətləndirir və əlverişli şəraitdə daha çox nəsil vermələrinə səbəb olur. Qısamüddətli istilik dalğaları və rütubət dəyişiklikləri də çoxalmanı təşviq edə bilər", – deyə o qeyd edib.
Mütəxəssisin sözlərinə görə, qlobal iqlim dəyişikliyi fonunda anomal istilər, qeyri-sabit yağıntılar və quraqlıqlar daha tez-tez müşahidə olunur. Bu isə bəzi həşərat növlərinin artımına zəmin yaradır.
Ekoloq vurğulayıb ki, istilər davam edərsə, təxirəsalınmaz tədbirlər görülməlidir. Zərərvericilərin erkən aşkarlanması üçün mütəmadi monitorinq aparılmalı, potensial böhranların qarşısı vaxtında alınmalıdır.
