Kənd Təsərrüfatı Nazirliyi yanında Aqrar Xidmətlər Agentliyinin Bitki Mühafizəsi və Fumiqasiya Mərkəzi tərəfindən bitkilərin zərərvericilərdən qorunması məqsədilə həyata keçirilən tədbirlər davam etdirilir.
Hazırda Lənkəran rayonunun Nərimanabad, Üzümçülük, Liman, Port, Şirinsu, Boladi və Zövlə kəndlərində Amerika ağ kəpənəyinə qarşı kimyəvi mübarizə tədbirləri aparılır.
Mütəxəssislərin apardığı mütəmadi müşahidələr nəticəsində zərərvericinin yayıldığı ocaqlar müəyyən edilib və vaxtında müdaxilə olunub. Zərərvericinin yayılmasının qarşısını almaq və bitkilərin sağlamlığını qorumaq məqsədilə ümumilikdə 500 hektar ərazidə müvafiq tədbirlər görülür.
Xüsusi texnika və təsirli preparatlardan istifadə edilməklə aparılan çiləmə işlərinin əsas məqsədi bitkilərə ciddi ziyan vuran Amerika ağ kəpənəyinin populyasiyasını əhəmiyyətli dərəcədə azaltmaqdır.
Qeyd edək ki, Amerika ağ kəpənəyi həm meyvə, həm də meşə ağacları üçün ciddi təhlükə yaradan zərərvericilərdən biridir. Onun vaxtında aşkar edilərək məhv edilməsi məhsuldarlığın artırılması və kənd təsərrüfatı məhsullarının keyfiyyətinin qorunması baxımından mühüm əhəmiyyət daşıyır.
Aqrar Xidmətlər Agentliyi tərəfindən bitki mühafizəsi istiqamətində həyata keçirilən profilaktik tədbirlərin mövsüm ərzində davam etdirilməsi nəzərdə tutulur.
Mənbə: unukal.аz
