Cəlilabad rayonunun Şabanlı kənd sakini Sadıqov Asif Nadir oğlu maraqlı halla üzləşib. Bu haqda məlumatı Cenublu.az bu gün, 25 yanvar tarixində Bizim.media-ya istinadən verir.
Belə ki, o sosial yardım almaq üçün müvafiq quruma müraciət edib və adına nəqliyyat vasitəsinin olduğu üçün imtina cavabı alıb.
Onun adına BDYPİ-nin sistemində “Niva” markalı avtomobil görünsə də, A.Sadıqov heç vaxt avtomobilinin olmadığını iddia edir. Məsələyə aydınlıq gətirmək üçün A.Sadıqov müvafiq qurumlara müraciət edib.
Araşdırma zamanı məlum olub ki, əslində sözügedən “Niva” markalı avtomobil Bakı şəhəri, Nəsimi rayonu, Rəsulzadə küçəsində yaşayan Sadıqov Asif Nadir oğluna məxsusdur.
A.Sadıqov problemi həll etmək üçün Lənkəran Regional Qeydiyyat İmtahan və Texniki Baxış Şöbəsindən adına nəqliyyat vasitəsinin olmaması barədə arayış alaraq nazirliyin sisteminə yerləşdirib. Amma məsələ yenə də həllini tapmayıb. Sənədlərin müddəti bitdiyi üçün Asif eyni məzmunlu təmizlik arayışını yenidən alsa belə, problem olduğu kimi qalıb.
Məsələ ilə bağlı ƏƏSMN-dən bildirilib ki, Cəlilabad rayon sakini Sadıqov Asif Nadir oğlunun ünvanlı dövlət sosial yardımı ilə bağlı 2023-cü ilin sentyabr, oktyabr və noyabr ayları üzrə müraciətlərinə elektron sistem tərəfindən imtina verilib:
“İmtinalara səbəb Asif Sadıqovun vergi ödəyicisi kimi uçota alınsa da, gəliri barədə məlumatın təqdim edilməməsi və muzdlu işlə əlaqədar gəlirlərini təsdiqləyən MDSS ödənişlərinin olmaması olub. Bu il yanvarın 10-da ailə ünvanlı dövlət sosial yardımı ilə bağlı yenidən elektron qaydada müraciət edib. Bu dəfə elektron sistemdə Asif Sadıqovun adına nəqliyyat vasitəsi çıxdığına görə müraciətə imtina verilib. Hazırda vətəndaşın müraciətinə elektron qaydada baxılır, qısa müddət ərzində bununla bağlı müvafiq qərar qəbul ediləcək”.
[caption id="attachment_52625" align="alignnone" width="336"]
Foto Bizim.media[/caption]
