Bu gün Vətən müharibəsi şəhidimiz Nayib Qasımovun doğum günüdür.
Nayib Akif oğlu Qasımov 1997-ci il iyunun 12 -də Masallı rayonunun Mahmudavar kəndində anadan olub.
2016-cı ilin Aprel döyüşlərində və 2020-ci ilin Tovuz döyüşlərində iştirak edib. Aprel döyüşlərində göstərdiyi rəşadətə görə "Azərbaycan Ordusunun 100 illiyi" yubiley medalına layiq görülüb.
Vətən müharibəsi zamanı kəşfiyyatçı kimi həmişə öndə olub. Göstərdiyi şücaətə görə döyüş səngərində baş çavuş rütbəsinə layiq görülüb.
O, 2020-ci il oktyabrın 5-də Cəbrayıl rayonunun bir neçə kəndinin mənfur düşmənlərdən təmizlənməsində igidlik göstərib. Şəhid yoldaşlarının nəşini döyüş meydanından çıxararkən başından aldığı qəlpə yarasından özü də şəhid olub. Nayib Qasımovun nəşi oktyabrın 6-da doğulub boya-başa çatdığı Mahmudavar kəndində torpağa tapşırılıb.
Nayib "Vətən uğrunda", "Cəbrayılın azad olunmasına görə" və "Hərbi xidmətlərə görə" medalları ilə təltif edilib.
