"1849-cu il Lənkəran qəzasının kameral təsviri" adlı ensiklopedik kitab ikinci dəfə çap olunub. Bu haqda məlumatı Cenublu.az bu gün, 27 aprel tarixində verir.
Kitabda respublikamızın Astara, Lerik, Yardımlı, Lənkəran, Masallı, Cəlilabad və Biləsuvar rayonlarının, eləcə də Sabirabad, Saatlı və İmişli rayonlarının Kürdən cənubda yerləşən bütün yaşayış məntəqələrinin əhalisinin siyahıyaalınması göstərilib. 856 səhifədən ibarət kitabda kameral təsvirlə yanaşı, həmçinin regionun əhalisinin tarixi keçmişinə dair geniş tədqiqat materialları da təqdim olunub. Bu materiallara regionun Talış xanlığının son çağlarına dair xəritələr, statistik məlumatlar da aiddir. Kitab insanlara öz əcdadlarının adlarını, şəcərələrini, doğma diyarlarının, kəndlərinin tarixlərini göstərən dəyərli bir sənəddir. Bu sənədlər müəlliflərin səyi nəticəsində tərcümə olunmuş, tədqiq olunmuş və oxuculara çatdırıla biləcək hala salınıb.
Qeyd edək ki, kitabın müəllifləri Razzaq Xansuvarov və Ağaəli Ağayevdir.
