Lənkəran rayonunun Şürük kənd tam orta məktəbinin binasını təmir etməkdə təşəbbüs göstərən, vaxtilə məktəbin məzunu olan Emin Bağırovu birgə tanıyaq.
Emin Bağırov Lənkəran rayonunun Türkəkəran kəndində anadan olub. 10-11-ci sinifləri Şürük kənd tam orta məktəbində oxuyub, bu məktəbin məzunu olub. Hal-hazırda mexanika üzrə fəlsəfə doktorudur. Böyük elmi işçi kimi Elm və Təhsil Nazirliyinin Riyaziyyat və Mexanika institunda çalışır. O, eyni zamanda 2005-ci ildə, magistr olduğu illərdə “EMİN TK” MMC firmasını təsis edib.
“2020-ci ilin aprel ayının sonunda məktəbə gəldim və məktəbin sanitar qovşağının pis vəziyyətdə olduğunu gördüm. Məktəb rəhbərliyindən icazə aldım ki, sanitar qovşağının yenisini tikim. Burada durum yaxşı olmadığı üçün daha sonra mərhələli şəkildə məktəb rəhbərliyindən icazə alaraq burada təmir işlərini apardım. Biz bu işləri gördüyümüz zaman Elm və Təhsil Nazirliyi bundan xəbər tutdu. Çox sağ olsunlar ki, onlar da bizə dəstək oldular və məktəbin dam örtüyünü yenilədilər”, - deyə Emin Bağırov söyləyib.
“Şürük kənd tam orta məktəbinin təmiri növbəti illər üçün nəzərdə tutulmuşdu. Buna baxmayaraq, Şürük kənd sakini, eyni zamanda məktəbin vaxtilə məzunu olmuş Emin Bağırov tərəfindən məktəbin təmiri ilə bağlı təşəbbüs irəli sürüldü”, - deyə Lənkəran-Astara Regional Təhsil İdarəsinin müdiri Elxan Nəcəfov bildirib.
“Bizim məktəbimizin ilkin tarixi 1923-cü ildir. 1976-cı ildə isə bizim yeni binaya köçürülüb. O tarixdən bu günə qədər məktəb tam təmir olunmayıb. Keçən illərdə məktəbimizin qapı və pəncərələri rütubət üzündən yararsız hala düşmüşdür və 2020-ci ildə, gözləmədiyimiz kimi, 2-3 ildə məktəbimiz əsaslı təmir səviyyəsində təmir olundu”, - Şürük kənd tam orta məktəbinin direktoru Namiq Bağırov deyib.
Emin müəllimin imkanları ilə məktəbin sinif otaqları, koridoru, laboratoriyaları, sanitar qovşağı, idman zalı əsaslı şəkildə təmir olunub, məktəbin pəncərələri yenilənib.
“Bunları mən etdikcə hiss edirdim ki, şirkətdə işlərimiz daha da irəli gedir, daha yaxşı olur, ruzimiz artır. Bu məktəbin nə vaxtsa təmir olunacağına mən əmin idim. Deyirdim ki, dövlətimiz zamanı çatanda buranı təmir edəcək. Amma mən düşünmürəm ki, belə olmalıdır. Biz məktəbimizin yanında olmalıyıq. Mənim 4 qızım və 1 oğlum var. 5 övlad atası kimi mən məktəbi təmirsiz görəndə bir anlıq gözümün önündə öz qızlarımın belə bir məktəbdə oxuması canlandı və mən buna razılaşmadım”, - deyə Emin Bağırov əlavə edib.
