Bu gün əslən Masallı rayonundan olan polkovnik-leytenant Ramiz Cəfərovun xatirəsi yad edilir.
Cenublu.az xəbər verir ki, Ramiz Sübhan oğlu Cəfərov 1974-cü il dekabrın 10-da Ukraynanın Makeyevka şəhərində anadan olub.
1981-1985-ci illərdə Sumqayıt şəhərində 17 nömrəli tam orta məktəbdə, 1985-1989-cu illərdə Sumqayıt şəhərində 11 nömrəli tam orta məktəbdə, 1989-1992-ci illərdə isə Cəmşid Naxçıvanski adına Hərbi Liseydə təhsil alıb. 1992-1996-cı illərdə V.F.Marqelov adına "Suvorov" ordenli Ryazan Qvardiya Ali Hava-Desant Komandanlığı Məktəbində ali hərbi təhsil alıb. Alman, ingilis və rus dillərini bilirdi.
Azərbaycan Ordusunun polkovnik-leytenantı olan Ramiz Cəfərov Vətən müharibəsi zamanı Şuşanın azadlığı uğrunda gedən döyüşlərdə savaşıb. Ramiz Cəfərov noyabrın 6-da Şuşa döyüşləri zamanı şəhid olub. II Şəhidlər Xiyabanında dəfn olunub.
Ramiz Cəfərova "Vətən Müharibəsi Qəhrəmanı" adı verilib.
O, ölümündən sonra "Vətən uğrunda", "Cəbrayılın azad olunmasına görə", "Şuşanın azad olunmasına görə", "Füzulinin azad olunmasına görə", "Xocavəndin azad olunmasına görə" medalları ilə təltif edilib.
