Lənkəranda tanışını qətlə yetirməkdə təqsirli bilinən Hüseyn Nəzərli Ali Məhkəməyə müraciət edib. Bu haqda məlumatı Cenublu.az bu gün, 25 noyabr tarixində Olke.az-a istinadən verir.
Onun şikayətinə hakim Ələsgər Novruzovun sədrliyi ilə keçiriləcək məhkəmə prosesində baxılacaq. İş üzrə məhkəmə baxış iclası gələn il fevralın 6-na təyin olunub.
Qeyd edək ki, Hüseyn Nəzərli Lənkəran şəhərində yerləşən avtomobil ehtiyat hissələri mağazasında satıcı, onun tanışı Sakit isə həmin mağazanın həyətində aparılan tikinti işlərində fəhlə işləyiblər. Sakit ondan zəhmət haqqını tələb edərkən kassada pul olmadığı üçün onların aralarında mübahisə yaranıb. Mübahisə zamanı Sakit yumruqla Hüseynin burun nahiyəsindən vurub.
Aralarında yaranmış münaqişəni sonlandırmaq məqsədilə Hüseyn Sakit İbrahimzadə ilə Lənkəran şəhəri, “Ləvəngi dairəsi” adlı yerdə görüşüb və onlar taksi ilə Lənkəran çayının Lənkəran rayonu, Sütəmurdov kəndi ərazisindən keçən hissəsinə, dəmir yolu körpüsünün altındakı yola gəliblər.
Orada aralarında yaranmış mübahisə zamanı Hüseyn Nəzərli üzərində götürdüyü bıçaqla Sakit İbrahimzadənin sol bud və sol qasıq nahiyələrinə qəsdən zərbələr endirib.
Hüseyn Nəzərli Sakit İbrahimzadənin qanitirməsinin çox olduğunu görüb və öləcəyindən qorxduğu üçün özünə məxsus mobil telefonla tanışlarına zəng edib, onları hadisə yerinə köməyə çağırıb. Sonuncuların və özünün köməyi ilə Sakit Lənkəran rayon mərkəzi xəstəxanasına çatdırılıb.
İxtisaslı tibbi yardım göstərilsə də, Sakit İbrahimzadənin həyatını xilas etmək mümkün olmayıb.
Hadisəni törədən Hüseyn Nəzərli barəsində Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.
Lənkəran Ağır Cinayətlər Məhkəməsinin hökmü ilə Hüseyn Nəzərli 9 il müddətinə azadlıqdan məhrum edilib. Hökmdən narazı qalan zərərçəkmiş şəxsin hüquqi varisi tərəfindən apellyasiya şikayəti verilib.
Şikayət araşdırılması üçün Şirvan Apellyasiya Məhkəməsinə göndərilib. Hakim Məhəmməd Bağırovun sədrliyi ilə baş tutan iclasda apellyasiya şikayətinin dəlilləri araşdırılıb, sonda qərar elan edilib.
Qərara görə, zərərçəkmiş şəxsin hüquqi varisi tərəfindən verilən şikayət təmin edilməyib.
