Astara arıçıları qanunsuz olaraq gecə vaxtı arıları Biləsuvar rayonuna gətirib və burada yerləşdiriblər. Bununla bağlı Biləsuvar Rayon Fermerlər Şurasının və arıçıların rayon təşkilatının sədri Hacı Gülağa Hüseynov şikayətini Qafqazinfo.az-a bildirib.
Onun sözlərinə görə, bu vəziyyət artıq 3-4 ildir davam edir. “Bu hal arıçılıq haqqında qanunun kobud şəkildə pozulması deməkdir. Bizim arılarımızda xəstəlik riski yaranır və sort qarışıqlığı olur”, – deyə o bildirib.
“Məsələ ilə bağlı Astara Dövlət Aqrar İnkişaf Mərkəzinə müraciət etmişəm. Onların sədri zəng edərək faktı təsdiqlədi – Astaradan qanunsuz miqrasiya olunur. Sədr Etibar Abbasov bildirib ki, iki dəfə iclas keçirib və arıların Biləsuvar rayonu ərazisinə aparılmasının qeyri-qanuni olduğunu söyləyib. Lakin, buna baxmayaraq, yenə də gətirirlər. Biləsuvar rayon Polis Şöbəsinə və İcra Hakimiyyətinə də müraciət etmişəm. Ancaq şəxsin kim olduğunu tapa bilmirlər”, – deyə Hüseynov əlavə edib.
Biləsuvar Rayon İcra Hakimiyyətindən isə bildiriblər ki, arılar gecə saatlarında Astaradan gətirilərək Biləsuvardakı torpaq sahələrində yerləşdiriliblər. Bunun üçün də əvvəlcədən torpaq sahibləri ilə razılaşıblar. Amma bütün bunlar tam qanunsuzdur.
Qeyd edək ki, Nazirlər Kabinetinin 16 nömrəli qərarına əsasən, Astara arıları yalnız Cəlilabad, Masallı, Yardımlı, Lənkəran və Lerik rayonlarına miqrasiya oluna bilərlər. Onların Biləsuvara miqrasiyası yolverilməzdir. Buna səbəb isə iqlim şəraitinin müxtəlifliyidir.
