Salyanda adam oğurluğu və mənzil toxunulmazlığının pozulması ilə bağlı məhkəmə işi üzrə yeni qərar qəbul edilib.
İttihama görə, hadisə 2024-cü il iyunun 9-da Salyan rayonunun kəndlərindən birində baş verib. Abdulla İbişov əmisi oğlu Zabil İbişov və dostu Rəvan Məmmədovla birlikdə sevdiyi qızı Ləman Babayevanın evdən zorla aparılması üçün plan qurub. Onlar özlərini "Azərişıq" əməkdaşları kimi təqdim edərək evə daxil olub, qızın atasını zərərsizləşdirərək Ləmanı avtomobillə aparıblar.
Hadisədən sonra hər üç şəxs saxlanılıb.
Lənkəran Ağır Cinayətlər Məhkəməsi Abdulla və Zabil İbişovun hər birini 8 il 3 ay müddətinə azadlıqdan məhrum edib, Rəvan Məmmədova isə 3 il sınaq müddəti olmaqla şərti cəza verib. Şirvan Apellyasiya Məhkəməsi Zabil İbişovun cəzasını 4 il 2 ay 28 günədək azaldıb.
Ali Məhkəmənin son qərarından sonra işə yenidən apellyasiya instansiyasında baxılacaq.
Mənbə: pravda.аz
