Məsud Əliağa oğlu Məmmədov 27 iyul 1937-ci ildə Astara rayonunun Şahağac kəndində anadan olub [1]. Yazıçı Məsudi Dövran təxəllüsü ilə tanınır [3].
O, ilk təhsilini Şiyəkəran kənd orta məktəbində alıb. Məmmədov 1954-1956-cı illərdə indiki Azərbaycan Tibb Universitetində oxuyub. Məsud Məmmədov 1959-1961-ci illərdə hərbi xidmətdə olub. O, 1962-1967-ci illərdə indiki Bakı Slavyan Universitetində təhsil alıb. Yazıçı 1967-1973-cü illərdə Azərbaycan Milli Elmlər Akademiyasının Dil və Ədəbiyyat İnstitutunun Qafqaz və İran şöbəsində işləyib. Bir müddət sonra o, ailəsi ilə birgə Özbəkistana köçüb. Burada Məmmədov Gülüstan Dövlət Universitetində müxtəlif vəzifələrdə çalışıb. O, 1994-cü ildən Lənkəran Dövlət universitetində humanitar elmlər fakültəsində işləyir.
Məsud Məmmədov 1982-ci ildə filologiya elmləri doktoru, 1985-ci ildə isə professor elmi dərəcəsini alıb.
Yazıçı bədii yaradıcılığa beşinci sinifdə oxuyarkən başlayıb. Onun “Vətən xilaskarı”, “Olacaqsan” adlı ilk şeirləri 1950-ci ildə, Məmmədovun 13 yaşı olarkən çap edilib. Məsud Məmmədovun əsərləri sonralar “Söz”, “Məşəl”, “Şəfəq” və digər mətbuat orqanlarında nəşr olunub [1]. Yazıçının əsərləri sırasında “Həsrət”, “Belə dünyadı bu dünya”, “Yadına düşür”, “Ümid”, “İnsan” və s. qeyd etmək olar [1,2]. Onun özbək dilində çap olunmuş “Turandan avaz” adlı şeir kitabı da var [1].
2021-ci ildə Məsud Məmmədovun 448 səhifədən ibarət “Azərbaycanın Lənkəran zonasının toponimləri” adlı elmi monoqrafiyası çap edilib. Elmi əsərdə Astara, Lənkəran, Lerik, Masallı və Yardımlı rayonlarının toponimləri leksik-semantik, həmçinin qrammatik cəhətdən elmi araşdırılıb, bölgənin etnonim və toponimləri tədqiq olunub [3]. O, 500-dən çox elmi məqalənin, 7 monoqrafiya və 8 şeir kitabının müəllifidir [4].
Yazıçı 1987-ci ildə Özbəkistanın “Xalq maarifi əlaçısı” nişanı ilə təltif edilib. Bundan əlavə, o, Özbəkistanın “Əməkdar elm xadimi” adına layiq görülüb [1]. 2001-ci ildən Məmmədov Azərbaycan Yazıçılar Birliyinin üzvüdür [1,3].
Ədəbiyyat:
