Lənkəran şəhəri, Bayraq meydanının yaxınlığında, Xəzər dənizinin sahil zolağında və Masallı rayonu, Masallı meşəbəyliyinin 21 saylı dolayında ümumilikdə 20.000 kv.m sahədə təmizlik aksiyaları keçirilib. Bu haqda məlumatı Cenublu.az bu gün, 16 sentyabr tarixində verir.
Aksiya zamanı ərazilərdən ümumi həcmi 350 kq olan bərk məişət tullantısı, müxtəlif plastik qablar, polietilen torbalar yığışdırılaraq aidiyyəti üzrə tullantı poliqonlarına daşınıb.
100 nəfərin iştirak etdiyi iməciliklər zamanı iştirakçılar arasında bərk məişət tullantılarının düzgün idarə olunması sahəsində zəruri maarifləndirmə və məlumatlandırma işləri aparılıb.
Qeyd edək ki, iməcilik Lənkəran Şəhər İcra Hakimiyyətinin və 1 saylı Regional Ekologiya və Təbii Sərvətlər İdarəsinin təşkilatçılığı, o cümlədən Lənkəran şəhər Mənzil İstismar və Kommunal Müəssisələr İdarəsi, Lənkəran Şəhər Yaşıllaşdırma Müəsissəsi, Lənkəran şəhər Mənzil Təsərrüfatı İdarəsi, Hirkan Milli Parkı, Cənub Regional Hidrometeorologiya Mərkəzi, 1 və 11 saylı Regional Meşə Təsərrüfatı mərkəzləri əməkdaşlarının birgə iştirakı ilə keçirilib.
