Hacı Səlim Qasir oğlu Axundzadə 1872-ci ildə Lənkəran şəhərində anadan olub. O, Azərbaycan Xalq Cümhuriyyətinin yaradıcılarından və onun ilk parlament üzvlərindən biri olub [1].
Axundzadə ilk təhsilini atası, şair Mirzə İsmayıl Qasirin Lənkəranda açdığı “Üsuli-Cədid” (yeni üsul) məktəbində alıb, sonra Lənkəran rus gimnaziyasında oxuyub. O, gimnaziyanı bitirdikdən sonra şəhər polis idarəsində, Əsgərxan Talışinskinin yanında katib işləyib. Sonralar Axundzadə Ərdəbil, Zəncan, Nəcəf şəhərlərində dini təhsil alıb. Bir müddət keçdikdə isə o, Türkiyə və bir sıra Avropa ölkələrinə səfər edib. Hacı Səlim Axundzadə 1911-ci ildə Lənkərana qayıdaraq, 1916-cı ilə kimi şəhər gimnaziyasında müəllim kimi çalışıb [1].
Hacı Səlim 1917-ci ildən Müsavat Partiyasının üzvü olub. O, həmin partiyanın birinci və ikinci qurultaylarının iştirakçısı olub. Axundzadə, həmçinin 1918-ci ildə Zaqafqaziya seyminin Müsəlman fraksiyasının, sonra isə Azərbaycan Milli Şurasının üzvü olub [1,2]. Axundzadə 28 may 1918-ci ildə Milli Şuranın Tiflisdə keçirdiyi iclasında iştirak edir və dövlətin adının məhz Azərbaycan qoyulmasının tərəfdarı olur [3].
1918-ci ildə erməni quldur dəstəsi başda Andronik olmaqla Zəngəzurda azərbaycanlı əhalini qətlə yetirərkən Axundzadə 4000-lik qoşuna başçılıq edərək, mahalın erməni quldurlarından təmizlənməsində fəal iştirak edib [4].
Hacı Səlim Axundzadə Azərbaycan Xalq Cümhuriyyəti Parlamentinin üzvü seçilmişdir. Həmin dövrdə o, Bakıda və Azərbaycanın digər bölgəIərində həyata keçirilən mədəni-maarif tədbirlərinin təşkilatçılarından olmuşdur [2].
1924-ci ildən sonra Axundzadə İranın Ənzəli şəhərinə köçərək, orada şəriətdən dərs deyib [2,3].
Hacı Səlim Axundzadə 15 dekabr 1930-cu ildə İranın Ənzəli şəhərində vəfat edib və Laləzar qəbiristanlığında dəfn olunub [3].
Ədəbiyyat:
