Bu gün Astaralı şəhidimiz Orxan Sədail oğlu Babayevin ad günüdür.
Orxan Babayev 1994-cü ildə dekabrın 24-ü Lovayın kəndində anadan olub. Astara rayon A.Hidayətov adına Lovayın kənd tam orta məktəbində təhsil alıb.
Təhsilini başa vurduqdan sonra bir müddət təsərrüfat işləri ilə məşğul olub. 2013-2014-cü illərdə həqiqi hərbi xidmətdə olub.
Orxan müddətdən artıq xidmət etmək üçün hərbiyə qayıdıb və baş çavuş rütbəsində atıcı-qumbaraatan vəzifəsində xidmət etməyə başlayıb. Vətən müharibəsi zamanı Füzuli, Cəbrayıl uğrunda gedən ağır döyüşlərdə böyük qəhrəmanlıqlar göstərərək, düşmənə sarsıdıcı zərbələr endirib, xeyli sayda canlı qüvvəsini məhv edib.
O, qələbəyə bir gün qalmış - 2020-ci ildə noyabrın 7-si Şuşa şəhəri uğrunda gedən şiddətli döyüşlərdə qəhrəmancasına şəhid olub. Şəhidin nəşi Astara rayonunun Ojəkəran kəndinə gətirilib və kənd qəbiristanlığında böyük izdihamla torpağa tapşırılıb.
Ölümündən sonra "Şuşanın azad olunmasına görə" və "Vətən uğrunda" medalları ilə təltif edilib.
