Anasını xüsusi amansızlıqla qətlə yetirməkdə təqsirləndirilən 2008-ci il təvəllüdlü Səid Əliyevin cinayət işi üzrə məhkəmə prosesi başa çatıb.
İttihama görə, hadisə Abşeron rayonunun Məmmədli kəndində baş verib. Salyan sakini, 1986-cı il təvəllüdlü Rəfiqə Əliyeva ailəsini tərk edərək başqa bir kişi ilə yaşamağa başlayıb.
Oğlu Səid anasının geri qayıtmasını istəyib, lakin qadın imtina edib. Bundan sonra yeniyetmə evdən bıçaq götürərək Bakıya gəlib və anası ilə görüş zamanı onu bıçaqlayaraq qətlə yetirib.
Cinayətdən sonra hadisə yerindən qaçan Səid Əliyev qısa müddət sonra polis tərəfindən saxlanılıb və məsuliyyətə cəlb edilib.
Sumqayıt Ağır Cinayətlər Məhkəməsinin hökmü ilə Səid Əliyev 7 il 6 ay müddətinə azadlıqdan məhrum edilib.
