Bu gün Cəlilabaddan olan Vətən müharibəsi şəhidi Tərlan Quliyevin doğum günüdür.
Tərlan Quliyev 1999-cu ildə dekabrın 22-si Tahirli kəndində anadan olub. 2006-2017-ci illərdə Cəlilabad rayon Cəngan kənd tam orta məktəbində təhsil alıb. Subay idi.
Xidmətə Goranboy rayonundakı N saylı hərbi hissədə başlayıb, andiçmə mərasimindən sonra isə Ağdamın Baharlı qəsəbəsində davam etdirib. Hərbi xidmətini başa vurduqdan sonra 6 aylıq xüsusi təyinatlı kursunu keçib və Xüsusi Təyinatlı Qüvvələrin sıralarında müddətdən artıq həqiqi hərbi xidmət qulluqçusu olub.
2020-ci ildə, Vətən müharibəsi zamanı Tərlan Füzuli, Murov, Kəlbəcər, Hadrut, Xocavənd istiqamətlərindəki döyüşlərdə igidliyi və qorxmazlığı ilə fərqlənib. Oktyabrın 17-də Füzuli rayonu istiqamətində döyüş tapşırığının yerinə yetirilməsi zamanı şəhid olub. Cəlilabad rayonunun Tahirli kəndində dəfn edilib.
Ölümündən sonra “Vətən uğrunda”, “Kəlbəcərin azad olunmasına görə”, “Xocavəndin azad olunmasına görə” və “Füzulinin azad olunmasına görə” medalları ilə təltif olunub.
