Lənkəran şəhər İcra Hakimiyyətinin başçısı Taleh Qaraşov ucqar dağ kəndi Gəgiranda şəhid Rasim Mirzəyevin övladının xeyir məclisində iştirak edib. Bu haqda məlumatı Cenublu.az bu gün, 27 iyun tarixində verir.
İcra başçısı ilk olaraq şəhid Rasim Mirzəyevin xatirəsinə inşa olunan bulağı ziyarət edib, önünə tər güllər düzüb. Daha sonra şəhidin övladının xeyir işinə yollanan başçı orada geniş nitq ilə çıxış edib. Taleh Qaraşov şəhid yadigarının qəhrəman atasının şərəfli ömür və döyüş yolu ilə fəxr etməli olduğunu vurğulayıb. İcra başçısı şəhid övladına sağlam, xoşbəxt həyat arzu edib, onun atası kimi xalqına və dövlətinə layiq vətənpərvər övlad böyüyəcəyinə olan inamını ifadə edib. Şəhid atası Fəttah Mirzəyev icra başçısına və gələn digər qonaqlara öz minnətdarlığını bildirib.
Qeyd edək ki, şəhid Rasim Mirzəyev Vətən müharibəsində göstərdiyi cəsarətinə və şücaətinə görə ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
