Lənkəran-Astara Regional Təhsil İdarəsinin müdiri tərəfindən fəxri fərmanlar təqdim edilib. Bu haqda məlumatı Cenublu.az bu gün, 7 aprel tarixində verir.
Lənkəran-Astara Regional Təhsil İdarəsinin inzibati binasında idarə müdiri tərəfindən Lənkəran və Masallı rayonları üzrə ATİAHİ-nin sədrlərinin iştirakı ilə Metodkabinetin Masallı rayonu üzrə metodisti Fətullayev Qardaş Məhərrəm oğluna və Lənkəran rayonu üzrə təhsil sektorunun aparıcı məsləhətçisi Aslanov Aslan İsaq oğluna fəxri fərmanların təqdim edilməsi üçün görüş keçirilib.
Görüş zamanı təcrübəli təhsil işçiləri ilə təhsil sahəsində aparılan islahatlar, görülən işlər və gələcəkdə planlaşdırılan fəaliyyətlər haqqında müzakirələr aparılıb.
Hazırda Fətullayev Qardaş Məhərrəm oğlu Masallı rayonu üzrə təhsil sektorunun metodisti vəzifəsində çalışır. Təhsil sahəsində göstərdiyi uzunmüddətli nailiyyətlərinə görə o, “Tərəqqi”, “Əmək igidliyinə görə”, “Əmək veteranı” medalları və “Şərəf nişanı” ordeni ilə təltif olunub.
Digər təltif olunan Aslanov Aslan İsaq oğlu isə Lənkəran rayonunun təhsil sahəsində uzun müddət səmərəli fəaliyyət göstərib. O, 2-ci dərəcəli dövlət qulluqçusu olub. 2023-cü ilin mart ayında çalışmanın yaş həddinə çatdığı üçün əmək müqaviləsinə xitam verilib.
