"TikTok"da saxta qadın profili açaraq kişiləri şantaj edən Aslan Babayev 5 il 6 ay azadlıqdan məhrum edilib.
Lənkəran Ağır Cinayətlər Məhkəməsinin hökmünə əsasən, o, hədə-qorxu ilə tələb etmə və saxta sosial şəbəkə hesablarından istifadə edərək böhtan və təhqirdə təqsirli bilinib.
İstintaqla müəyyən olunub ki, Aslan Babayev 2025-ci ildə Saatlı şəhərindəki evindən şəxsiyyətini gizlətmək üçün "TikTok"da "Aylin Qurbanova" adlı saxta qadın profili yaradıb. Bu profil vasitəsilə tanış olduğu şəxslərin fotolarını əldə edib, onların üzərinə təhqiramiz ifadələr yazaraq sosial şəbəkədə yayacağı ilə hədələyib və bunun müqabilində pul tələb edib.
Zərərçəkənlərdən biri ona 500, digəri isə 200 manat göndərib. Təqsirləndirilən şəxs məhkəmədə bu pulları qanunsuz mərc oyunlarında uduzduğunu etiraf edib. O, həmçinin "Müəllimə" adlı daha bir saxta profildən istifadə etdiyini və profillərdəki qadın şəkillərini internetdən götürdüyünü bildirib.
Aslan Babayev ifadəsində özünü tam təqsirli bilib, zərərçəkmiş şəxsləri əvvəllər tanımadığını, onlarla yalnız sosial şəbəkə vasitəsilə əlaqə saxladığını deyib.
Ad və soyad şərtidir.
Mənbə: Pravda.аz
