Salyan rayonunda fəaliyyət göstərən ərzaq bazarında Qida Təhlükəsizliyi Agentliyi tərəfindən aparılan monitorinq zamanı ciddi nöqsanlar aşkarlanıb.
Cenublu.az xəbər verir ki, agentliyin keçirdiyi nəzarət tədbirləri çərçivəsində müəyyən edilib ki, bazarda turşu, mürəbbə, süd məhsulları və çiy toyuq əti müvafiq sənədlər olmadan və antisanitar şəraitdə satışa çıxarılıb. Eyni zamanda balıq məhsullarının və müxtəlif növ ətlərin soyuducu avadanlıqdan kənarda, açıq şəkildə alıcılara təqdim edildiyi məlum olub.
Yoxlama zamanı bazarın sanitar-gigiyenik və sanitar-texniki tələblərə cavab vermədiyi, qida məhsullarının saxlanılması və tələb olunan temperatur rejiminin təmin edilməsi üçün zəruri avadanlıqlarla təchiz olunmadığı da üzə çıxıb.
