Cənub zonasında sahibsiz itlərlə bağlı problem səngimək bilmir. Əsasən də, son zamanlar Cəlilabad bu mövzu ilə bağlı gündəmə gəlir. Belə ki, rayon mərkəzində yerləşən bütün küçələr sahibsiz itlərin məskəninə çevrilib.
Cəlilabad Rayon Mərkəzi Xəstəxanasından verilən məlumata görə, il ərzində tibb müəssisəsinə heyvan dişləməsi ilə bağlı 263 müraciət daxil olub. Onlar, əsasən, it dişləməsi ilə bağlıdır. Müraciət edənlərdən 134 nəfər 18 yaşına qədər olan şəxslərdir.
Kənd Təsərrüfatı Nazirliyi yanında Aqrar Xidmətlər Agentliyi Heyvan Sağlamlığı və Baytarlıq Xidmətləri Mərkəzinin Cəlilabad Rayon Heyvan Sağlamlığı və Baytarlıq Xidmətləri İdarəsindən bildirilib ki, qurum yalnız sahibləri bəlli olan itlərin vaksinasiyasını apara bilir.
Qeyd olunub ki, qurum, həmçinin lokalizasiyası məlum olan yerlərdə sahibsiz itlərin yalnız yem halında vaksinasiyasını aparmaq imkanına malikdir: “Mövcud vəziyyətdən çıxış yolu isə bu heyvanlar üçün sığınacaqların hazırlanmasıdır ki, yaxın günlərdə bölgələrdə bu tip mərkəzlərin tikilməsi dövlət proqramına salınıb”.
Qeyd edək ki, bu ayın əvvəlində Cəlilabad rayonu, R.Nəsirov küçəsində it dişləməsi nəticəsində 11 yaşlı Zülfiyyə Rzayeva dünyasını dəyişib.
