Səfərbərlik və Hərbi Xidmətə Çağırış üzrə Dövlət Xidməti (SHXÇDX) Lənkəranda gənclər üçün zərərli vərdişlərin fəsadlarına həsr edilmiş tədbir təşkil edib. Bu haqda məlumatı Cenublu.az bu gün, 17 may tarixində Apa.az-a istinadən verir.
Tədbirdə Dövlət Xidmətinin əməkdaşları ilə yanaşı, ali məktəbin müəllim və tələbələri, həmçinin hüquq-mühafizə orqanlarının əməkdaşları və bir sıra dövlət qurumlarının məsul şəxsləri iştirak ediblər.
Konfransda yeniyetmə və gənclər arasında sağlam həyat tərzinin təbliği, onların həyat üçün zərərli olan adətlərdən uzaqlaşdırılması istiqamətində həyata keçirilən tədbirlər barədə məlumat verilib.
Daha sonra “Azərbaycan bayrağı” ordenli Sulduz Həbibov Vətən müharibəsi ilə bağlı xatirələrini bölüşüb, gənclərə dəyərli tövsiyələrini çatdırıb.
Sonda tələbələr tərəfindən səhnələşdirilən, zərərli vərdişlərin ailələrə vurduğu ziyandan bəhs edən kiçik tamaşa təqdim edilib.
Tədbir SHXÇDX tərəfindən Lənkəran Dövlət Universiteti və Sosial və Aqrar-Texnoloji Kolleclə birgə keçirilib.
