Şirvan Apellyasiya Məhkəməsində qəsdən sağlamlığa yüngül zərər vurmaqda təqsirləndirilən Nazim Əlizadə barəsində dövlət ittihamçısının protesti üzrə məhkəmə iclası yekunlaşıb. Hakim Yaşar Həşimovun sədrliyi ilə keçirilən prosesdə qərar elan edilib.
Qərara əsasən, apellyasiya protesti təmin olunub və Sabirabad Rayon Məhkəməsinin hökmü dəyişdirilib. Nazim Əlizadəyə 5 ay müddətinə azadlıqdan məhrumetmə cəzası verilib və o, məhkəmə zalında həbs edilib.
İttihama görə, hadisə bu il – yanvar ayının 24-də, saat 01:00 radələrində Sabirabad rayonunun bir kəndində baş verib. Məlumata əsasən, sərxoş olan Nazim Əlizadə yaşadığı evdə anası – zərərçəkmiş Səmayə Əlizadə ilə mübahisə edib. Mübahisə zamanı o, anasına şillə, yumruq və təpiklə zərbələr endirib. Zərbələr nəticəsində qadında burun sümüyünün sınığı və sağ gözaltı nahiyədə piqmentasiya izi yaranıb. Bu xəsarətlər qəsdən sağlamlığa yüngül zərər vurma kimi qiymətləndirilib.
Hadisədən sonra Nazim Əlizadə saxlanılaraq cinayət məsuliyyətinə cəlb olunub. Sabirabad Rayon Məhkəməsinin əvvəlki hökmü ilə ona 5 ay 26 gün müddətinə azadlığın məhdudlaşdırılması cəzası verilmişdi.
Qeyd edək ki, ad və soyadlar şərtidir.
