Biləsuvarda ər arvadını vəhşicəsinə döyüb.
Hadisə Biləsuvar şəhəri ərazisində qeydə alınıb.
İttiham aktına görə, 41 yaşlı Vüsal Əliyev Rusiyada işləyirmiş. O, arvadının gecə saatlarında “Whatsapp”da onlayn olduğunu görərək, ondan şübhələnib. Bu səbəblə arvadına demədən gecəyarı Rusiyadan Bakıya, oradan da Biləsuvara evinə gəlib. Gecə saat 4 radələrində qapını dəfələrlə döysə də, açan olmayıb. Telefon zəngindən sonra qadın qapını açıb. Vüsal arvadının hərəkətlərindən şübhələndiyi üçün onun telefonuna baxıb. Bu zaman onun başqa bir kişi ilə səs yazısı ilə qarşılaşıb və qadından xəyanətinin səbəbini soruşub. Bu əməllərinə görə arvadının ağız nahiyəsinə kəllə zərbəsi vurub və saçından tutub yerə yıxaraq, sürüyüb.
Bu hərəkətinə görə Vüsal saxlanılıb və barəsində Cinayət Məcəlləsinin qəsdən sağlamlığa yüngül zərərvurma maddəsilə cinayət işi başlanıb.
Təqsirləndirilən şəxsin sözlərinə görə, 2005-ci ildə ailə qurub və 2 övladı var. Dolanışıq üçün Rusiyada işləyir. O, törətdiyi əməldən peşman olduğunu deyərək, barəsində daha yüngül cəza verilməsini xahiş edib.
Biləsuvar rayon Məhkəməsinin qərarı ilə Vüsal Əliyev barəsində 6 ay müddətinə azadlığın məhdudlaşdırılması cəzası verilib.
