Xəbər verdiyimiz kimi Lənkəran şəhər İcra Hakimiyyətinin başçısının müavini Rəsilə Əliyevanın adı 9-cu sinif şagirdini döyməkdə hallanır. Məsələ ilə bağlı o, bu gün, 15 iyul tarixində Bizim.media-ya açıqlama verib.
Rəsilə Əliyeva məktəblinin anası Ləman Camalovanın sözlərini təkzib edərək söyləyib: “Vəzifədəyəm deyə yapışılası adam mənəm? Axı mənim də səhhətim və evimdə ağır əməliyatdan çıxmış xəstəm var. Aliyənin anası çox şey iddia edə bilər. Yalan məlumatlardır. Onun anası haçandan ortaya çıxdı? O, heç bilmir ki, qızı kimlə yaşayır və onu kim saxlayır. Onun qızı əxlaqsızdır və biabırçı videoları var. Sinif yoldaşlarının adından ona-buna videolar atıb. Belə qızın məktəbdə qalıb oxuması düzgün deyil. Mənim qızımla da rəfiqə deyil və ola bilməz. O, hansı ailədə böyüyüb, bilinmir. Aliyənin xalası kimdi, onu əvvəl kim saxlayıb, gedin onları araşdırın”.
Həmçinin, Rəsilə Əliyeva əlavə edib: “Qızın attestatı mənim evimdə nə gəzir? Mən Təhsil Naziliyinə və ya rayon təhsil şöbəsinə müdaxilə edə bilərəm? Evimdə attestat verilir? Bu qədər yalan olmaz axı... Mən xalqın uşağını niyə döyürəm ki? Ya atası, ya da nənəsi videolarını görüb onu döyüblər. Sadəcə olaraq o videoları mən əldə etmişəm və polis bölməsinə də təqdim etmişəm. Onlar araşdırır. Anası çox şeyi iddia edə bilər. O zaman mən də bədənimin hansısa nahiyəsini göyərdib, fotosunu sizə atım, inanarsız? Bu məsələnin mənə aidiyyəti yoxdur. Niyə polis bölməsinə çağırılmalıyam ki?”
Qeyd edək ki, məsələ Daxili İşlər Nazirliyi tərəfindən nəzarətə götürülüb. Müvafiq ekspertiza təyin edilib və araşdırma aparılır.
