Lənkəran şəhər icra hakimiyyəti başçısının keçmiş müavini Rəsilə Əliyevanın adı rüşvət qalmaqalında hallanır. Bu haqda məlumatı Cenublu.az bu gün, 20 iyul tarixində Bizim.media-ya istinadən verir.
Azərbaycan Uşaqlar Birliyinin sədri Kəmalə Ağazadə sayta verdiyi açıqlamada bildirib ki, Rəsilə Əliyeva erkən nikaha razılıq vermək üçün 2500-4000 manat rüşvət tələb edib: “Deyilənə görə, hadisələr Rasilənin kabinetindəcə həll olunurmuş. Görün insanın vəzifəsindən sui-istifadə halları nə həddə olub ki, Rasilə Əliyeva məsuliyyətə cəlb olunduğu üçün Lənkəran toy-bayram edib, hətta qurban kəsilib”.
Kəmalə Ağazadə yeniyetmənin qapalı depressiya vəziyyətində olduğunu da qeyd edib. “Uşaq yaşadıqlarını bir növ artıq danışa bilir. Çünki ona həm qorxu, həm də utanc hissi böyük zərbələr vurub. Özünü qapalı və təcrid olunmuş hiss edir. Səbəb ona olunan fiziki zorakılıqla bərabər, həm də illərlə ailəsinə yaxın olan məktəb direktorunun hadisədə onu qətiyyən müdafiə etməməsi olub. Yeniyetmənin bir sözü mənə təsir etdi. “Mən idmanla məşğulam, ona güc gələ bilərdim. Amma bunu etmədim, çünki məni elə tərbiyə etməmişdilər. Bilirəm ki, özümdən böyüyə əl qaldırmaq olmaz. Amma haqqımı bundan sonra da qoruyacam”.
Həmçinin Kəmalə Ağazadə 4 saylı məktəbin direktoru ilə də görüşüb: “Direktora dedim ki, uşaq döyüləndə heç olmaya onu qucaqlayıb otaqdan çıxara bilərdiniz. O isə “mən onu qoruya bilməzdim, o qadından qorxuram, siz bilmirsiz nədir” dedi və artıq müəyyən etdim ki, Rasilə Əliyeva təkcə 15 yaşlı qıza deyil, bir çoxlarına psixoloji və fiziki zorakılıq tətbiq edib”.
Qeyd edək ki, Rəsilə Əliyeva ötən gün 9-cu sinif şagirdinə qarşı zor tətbiq etdiyi üçün vəzifəsindən azad olunub. Onun barəsində cinayət işi açılıb.
