Cəlilabad rayon İcra Hakimiyyətinin başçısı Rafiq Cəlilov Cəlilabad Elektrik Şəbəkəsinin kollektivinə Fəxri Fərman təqdim edib. Bu haqda məlumatı Cenublu.az bu gün, 13 aprel tarixində verir.
Belə ki, 2022-ci ildə və 2023-cü ilin birinci rübündə Cəlilabad rayonunun 26 kəndində elektrik dayaqları və transformator məntəqələri yenilənib. Eyni zamanda Cəlilabad və Göytəpə şəhərlərinin küçələri müasir tələblərə cavab verən işıqlandırma sistemi ilə təmin edilib və əhalinin istifadəsinə verilib. Rayon İcra Hakimiyyətinin təşəbbüsü və Elektrik Şəbəkəsinin iştirakı ilə rayonun bütün kəndlərində əhalinin müasir tələblərə cavab verən işıqlandırma sistemi ilə təmin edilməsi nəzərdə tutulub.
Görüş zamanı rayon elektrik şəbəkəsinin əməkdaşları tərəfindən 2022-ci ildə güclü qar və leysan yağışları zamanı yaranmış ekstremal hava şəraitinə baxmayaraq, gücləndirilmiş iş rejimində çalışması, Cəlilabad ərazisində vətəndaşların fasiləsiz elektrik enerjisi ilə təmin olunmasında əməkdaşların hadisələrə çevik reaksiyası rayon rəhbərliyi tərəfindən yüksək qiymətləndirilib və müvafiq tövsiyələr verilib.
Tədbirin sonunda rayon icra hakimiyyətinin başçısı tərəfindən Cəlilabad Elektrik Şəbəkəsinin kollektivinə Fəxri Fərman təqdim olunub.
