Astara rayon İcra Hakimiyyətinin başçısı Qəzənfər Ağayev Kijəbə qəsəbə inzibati ərazi dairəsi üzrə nümayəndəliyinə daxil olan dağlıq Ovala kəndində sakinlərlə səyyar qəbul-görüş keçirib. Bu haqda məlumatı Cenublu.az bu gün, 6 aprel tarixində verir.
İlk növbədə icra başçısı ötən görüşdən sonra sakinlər tərəfindən qaldırılan problemlərin həlli istiqamətində müəyyən işlərin görüldüyünü diqqətə çatdırıb. Başçı bildirib ki, kəndin əsas problemi yolla bağlıdır. Həmçinin qeyd olunub ki, Şağlazüzə-Şəmətük-Ovala-Sipiyəpart dairəvi avtomobil yolunun çəkilməsi üçün təkliflər verilib. Yaxın gələcəkdə bu problem həllini tapacaq.
Görüş iştirakçıları isə görülən işlərlə yanaşı, kəndə gələn avtomobil yolunun təmirinə, qəzalı vəziyyətdə olan elektrik dirəklərinin dəyişdirilməsinə, tibb məntəqəsinə həkimin təyin olunmasına, ünvanlı sosial yardımın verilməsinə, telefon xəttinin çəkilməsinə və internetin verilməsinə köməklik göstərilməsini xahiş ediblər.
İcra başçısı vətəndaşlar tərəfindən verilən təkliflərə münasibət bildirərək bəzi məsələlərin həlli ilə əlaqədar tapşırıqlar verib, digərlərinin həlli istiqamətində tədbirlərin müəyyən ediləcəyini bildirib.
